Pasou o tempo e cambiaron os costumes, e incluso as nomenclaturas e os xentilicios, pero as tradicións permanecen vivas entre as xentes do municipio coruñés de Val do Dubra, que se esforzan por non ter que abandonar as terras que os viron nacer. E pouco a pouco hano conseguir.

Falar de Val do Dubra é sinónimo a falar de Buxán. Desde o ano 1960 este municipio de 108,2 quilómetros cadrados de extensión recibe o nome de Val do Dubra. Trátase dun logro dos veciños que, tralo devir da historia e conscientes de que o elemento definitorio xeográfica e morfoloxicamente do concello é o val formado polo río Dubra, optaron por este nome para designar a un territorio cuxos límites municipais coinciden cos da conca deste río.

Veciños, que segundo o último censo de habitantes, acadan os 4802 en número e que viven repartidos entre as doce parroquias que constitúen este municipio: Arabexo, Bembibre, Buxán, Coucieiro, Erviñou, Niveiro, Paramos, Portomeiro, Portomouro, Rial, San Román e Vilariño. Non se atopan repartidos equitativamente, xa que son Bembibre, capital do municipio, e o pintoresco lugar de Portomouro os que maior poboación concentran por ser os dous núcleos principais, e ós que se pode acceder a través da estrada que vai de Santiago a Carballo e que atravesa o concello. Tendo en conta a superficie e a poboación deste concello, podemos dicir que Val do Dubra conta cunha densidade demográfica de 43,8 habitantes por quilómetro cadrado.

Difícil de definir climatoloxicamente, este municipio caracterízase polas abundantes precipitacións. O clima é oceánico e húmido, con precipitacións que roldan os 1.500 milímetros, mentres que as temperaturas medias oscilan arredor dos 12 grados. Os días de choiva ó ano non adoitan chegar ós 150, e no inverno pode haber xeadas. A elevada oferta de auga, xunto coa moderada demanda, fan que a seca sexa moi pouco intensa nestas terras, podendo sufrir períodos de seca absoluta tan só aqueles solos con reservas escasas e pouco profundas.